台灣文化藝術公益協會

【文、圖∕薛常威∕國立中央大學客家語文暨社會科學學系在職專班碩士】

 

　　「台灣文化藝術公益協會」係由畫家胡復金先生發心成立个，湊等一群畫家、藝術家分學校，社區申請協助，鼓勵學生摎社區民眾共下來美化自家个環境摎生活个品質。還有對偏鄉、資源較毋罅个單位分佢補助。



　　會摎胡先生熟識算將係難得个緣分，舊年𠊎去客委會做報告，恁堵好摎先生坐共台電梯，看起來佢就係一個當平凡和善个長輩，順續仔摎佢尞一下，正知講原來佢大有名。胡先生係中壢出世个客人，愛畫圖，還識跈等國際級个油畫大師楊三郎學畫圖，佢有當強烈个台灣意識，台灣一哪仔个風光山水全部係佢創作个材料，佢乜有參加台灣客家个布花發展，最厲害个佢做得完全用客家話紹介佢个作品，聽佢導覽，做得享受著語言摎繪畫藝術个美感。

　　「美無需要名山秀水，美毋係藝術家个專利。美存在兩隻石牯中央，美存在一片枯葉頂，最重要係美存在一隻善良个心。」胡先生个畫，毋係單淨看靚定定，每一幅畫，後背全部有感人个故事摎人生个道理在裡背肚。這擺正結束个特展就有兩幅當有意義个圖。



　　「大雪山林場」這張圖後背个意思係講，大樹个種子隨風吹，有兜落在較好个所在，有水有日頭，斯生到較遽較砸，嗄當早斯分人斬去做棟樑。有兜落在山林旮旯角，無水又曬毋著日頭，斯生著較慢較媸，無人注意，無人想愛去斬佢，最尾嗄長成神木。分人作棟樑起屋當好，變成百年个神木，看等一輩一輩个人生也盡生趣。

　　「笑看人間事」係講一隻貓仔恬恬坐等，看歸列頭犁犁看手機个人還生趣，原來這兜人到該排隊愛買手機，蘋果就係手機个logo。因為貓仔毋好手機，毋會受影響，佢嗄做得輕鬆笑看人間个事情。

　　胡復金先生正結束佢75歲个特展，佢還想愛再過發揮自家个影響力，斯成立這「台灣文化藝術公益協會」，愛分台灣還較好。今年還打算摎醫院合作，成立「潛能開發學苑」開分特殊个細人來上，開發佢兜个天分。
　　
薛常威先生 聲檔 —　台灣文化藝術公益協會（四縣腔）





　

▲BACK